Introdución
O obxectivo deste Código Ético é asegurar que a política deixe de estar ao servizo de
intereses particulares para ser unha actividade na que veciños e veciñas participen e
poidan decidir democraticamente en todos os asuntos da súa comunidade.
O presente documento recolle, sintetiza e adecúa ao noso ámbito municipal o enorme
esforzo de reflexión colectiva feito por moitas persoas pertencentes a moitos movementos
sociais na aspiración de atopar garantías para un exercicio limpo, transparente e
plenamente democrático das políticas públicas.
Articulado
Os candidatos e candidatas de Gondomar Concello Aberto:
1. Non poderán estar imputados ou condenados por delitos de corrupción, prevaricación,
tráfico de influencias, enriquecemento ilícito, suborno, malversación, apropiación de fondos
públicos e demais relacionados co exercicio da función pública. Tampouco por delitos por
violencia de xénero, xenofobia ou calquera outro contra os Dereitos Humanos ou os
dereitos das persoas traballadoras, renunciando de maneira automática ao seu cargo ante
unha imputación xudicial por as citadas causas.
2. Aceptarán a censura ou a revogación dos seus cargos por desleixo de funcións, mala
xestión, incumprimento non xustificado do programa ou dalgún aspecto deste Código
Ético, poñendo o seu cargo a disposición de Gondomar Concello Aberto.
3. Desempeñarán con lealdade, ética e transparencia as súas responsabilidades,
defendendo o establecido no Programa Político da candidatura, actuando como
verdadeiros representantes obrigados a seguir as decisións tomadas mediante
mecanismos democráticos. A candidatura combaterá especialmente calquera forma de
racismo, xenofobia ou discriminación por razón de xénero ou orientación sexual e
favorecerá a participación política das mulleres e da xuventude.
4. Comprometeranse á democratización do exercicio das súas funcións, a dar un trato
humano e digno aos veciños, moi especialmente a aqueles que pertenzan aos colectivos
áis vulnerables. Comprometeranse así mesmo a crear e facilitar nas áreas de traballo
que teñan baixo a súa responsabilidade un clima e una cultura administrativa de
transparencia, rendición de contas e portas abertas á veciñanza rexeitando
comportamentos autoritarios e non democráticos.
5. Todos os cargos electos con dedicación exclusiva aceptarán unha limitación salarial de
tres veces e media o salario mínimo interprofesional (o que supón unha rebaixa dun 24%
do actual salario do Alcalde no noso concello). Adecuaranse proporcionalmente as
dedicacións parciais. Establecerase un tope de gasto para este concepto. No caso de
necesitar dietas ou viáticos, estes no poderán superar as establecidas para o persoal
funcionario e laboral.
6. Renunciarán a agasallos e privilexios que se lles poidan ofrecer. Non duplicarán salarios
nin cargos, agás os vinculados á súa condición.
7. Subscribirán un compromiso de transparencia e rendición de contas ao longo e ao final
da súa actividade como representantes, velando polo bo uso dos bens públicos e por unha
xestión dos recursos municipais baseada en principios de eficiencia, equidade e eficacia.
8. Comprometeranse a defender que as relacións económicas e financeiras que o concello
precise sexan establecidas cunha banca ética na medida do posible.
9. Promoverán a participación veciñal na toma de decisións relevantes e na posición
política da candidatura en asuntos estratéxicos e proxectos de impacto social, ambiental
ou urbanístico.
10. Comprometeranse na defensa da lingua galega e a súa normalización na vida do
Concello e na protección e enriquecemento do patrimonio material e inmaterial, o medio
ambiente e a diversidade cultural e artística.